Jul 31 2026 | २०८३, साउन १५ गते
Follow us
२०८३, साउन १५ गते
Jul 31 2026 | २०८३, साउन १५ गते
काठमाडौं। आज (आश्विन शुक्ल दशमी) दुर्गा पक्षको मुख्य दिन अर्थात् विजया दशमी देशभर हर्षोल्लासपूर्वक मनाइँदै छ ।
नवदुर्गा भवानीको प्रतीक पूर्ण घडाको जलबाट वैदिक विधिपूर्वक अभिषेक गरी ठुलाबडा तथा मान्यजनबाट नवदुर्गाको प्रसाद स्वरूप रातो टीका र समृद्धिको प्रतीक जमरा लगाइँदै छ । दशैँघरमा घटस्थापनादेखि गरिएको पूजा आराधना आज विसर्जन गरी मान्यजनबाट टीका र जमरा ग्रहण गर्ने चलन रहिआएको छ । नेपाल पञ्चाङ्ग निर्णायक विकास समितिले आज बिहान ११स्५३ बजेको शुभ साइत उत्तम रहेको जनाएको छ । देवी विसर्जनको साइत बिहान ९:२३ बजे तोकिएको छ ।
समितिका अनुसार विजया दशमी आफैँमा शुभ दिन भएकाले सामान्य मानिसले साइत नहेरी दिनभर टीका प्रसाद ग्रहण गर्न सक्नेछन् । तर, राज्य सञ्चालकका लागि भने तोकिएको साइतमै टीका लगाउनुपर्ने परम्परा रहेको छ । शास्त्रीय वचनअनुसार राज्य सञ्चालकले साइतमै टीका ग्रहण गर्दा प्रभु, मन्त्र र उत्साह शक्ति प्राप्त हुने भएकाले साइत दिइने गरिएको हो ।
नवदुर्गाको स्थापना गरिएको स्थानमा नित्य पूजा गरी नौ दिनसम्म गरिएको आराधनापछि आश्विन शुक्ल दशमीको दिन देवीको प्रसाद स्वरूप टीका, जमरा ग्रहण गरी दुर्गा भवानीको शक्ति प्राप्त गर्ने विश्वास गरिन्छ ।
आज नभ्याउनेले कोजाग्रत पूर्णिमासम्म मान्यजनबाट टीका ग्रहण गर्न सक्ने व्यवस्था पनि परम्परागत रूपमा रहेको छ । टीका लगाउँदा पूर्व फर्केर लगाउनु पर्ने हुन्छ ।
विजया दशमी असत्यमाथि सत्यको विजयका रूपमा मनाइने पर्व हो । मर्यादा पुरुषोत्तम रामले रावणमाथि विजय प्राप्त गरेको वा शक्तिस्वरूपा देवी भगवतीले महिषासुर दैत्यको वध गरी विजयश्री प्राप्त गरेको स्मरणमा मनाइने यो पर्व हिन्दु सनातन धर्मावलम्बीहरूको महान् पर्वका रूपमा स्थापित छ ।
