Nov 20 2026 | २०८३, मंसिर ४ गते

Nov 20 2026 | २०८३, मंसिर ४ गते

Follow us

उपभोक्ता हित विपरीत गतिविधि नगर्न ललितपुर जिल्ला प्रशासनको आग्रह

उपभोक्ता हित विपरीत गतिविधि नगर्न ललितपुर जिल्ला प्रशासनको आग्रह

ललितपुर । जिल्ला प्रशासन कार्यालय ललितपुरले बडादसैँ, तिहार, नेपाल संवत्, छठलगायत चाडपर्वका अवसरमा उपभोक्ता हित विपरीतका गतिविधि नगर्न सरोकारवालाहरुलाई आग्रह गरेको छ ।

कार्यालयले एक सूचना प्रकाशित गर्दै अत्यावश्यक वस्तुमा कृत्रिम अभाव सिर्जना गर्ने, कालोबजारी, मूल्यवृद्धि, म्याद नाघेका वस्तु बिक्री वितरण गर्नेलगायत उपभोक्ता हित विपरीतका कार्य नगर्न सचेत गराएको हो ।

सवारीसाधनमा क्षमताभन्दा बढी यात्रु नबोक्न, तोकिएकोभन्दा बढी भाडा नलिन, मादक पदार्थ सेवन गरी सवारीसाधन नचलाउन र ट्राफिक नियम पालना गर्न जिल्ला प्रशासनले सबैलाई अनुरोध गरेको छ । चाडपर्वको बहानामा धार्मिक, जातीय वा सामाजिक सद्भावमा खलल पुग्ने गतिविधि नगर्नरनगराउन कार्यालयले सूचनामार्फत सबैलाई सचेत गराएको हो । 

साथै, गैर कानुनी रूपमा चिट्ठा, जुवातास, अनलाइन सपिङका नाममा हुने अवैध कारोबार तथा विद्युतीय माध्यमबाट हुने ठगीबाट बच्न सबैलाई ध्यानाकर्षण गराएको छ । जिल्लावासीलाई सार्वजनिक स्थलमा होहल्ला नगरी सभ्य र मर्यादित तरिकाले चाडपर्व मनाउन आग्रह गरिएको छ । गैर कानुनी गतिविधि देखिएमा नजिकैको प्रहरी कार्यालय वा जिल्ला प्रशासन कार्यालयमा जानकारी गराउनसमेत अनुरोध गरिएको छ । 

प्रशासन कार्यालयले बडादसैँ, तिहार, नेपाल संवत्, छठलगायत चाडपर्वका अवसरमा सबैलाई सुख, शान्ति, समृद्धि र सुस्वास्थ्य शुभकामना व्यक्त गर्दै सूचना जारी गरेको हो ।

प्रतिक्रिया दिनुहोस

सम्बन्धित समाचार