Sep 18 2026 | २०८३, असोज २ गते
Follow us
२०८३, असोज २ गते
Sep 18 2026 | २०८३, असोज २ गते
काठमाडौं । राष्ट्रिय तथ्याङ्क कार्यालयले प्रादेशिक आर्थिक तथ्याङ्क सार्वजनिक गरेको छ । कार्यालयको तथ्याङ्कअनुसार चालू आर्थिक वर्ष २०८२/८३ मा सबैभन्दा धेरै बागमती प्रदेशको आर्थिक वृद्धिदर ५.४० प्रतिशत र गण्डकीको ५. ०१ प्रतिशत हुने अनुमान छ । यसैगरी कोशीको ३.३१, लुम्बिनीको २.८७, कर्णालीको २.९४ र सुदूरपश्चिमको ३.३८ प्रतिशत वृद्धिदर हुने अनुमान छ । उक्त तथ्याङ्क अनुसार चालू आर्थिक वर्ष २०८२/८३ मा मधेश प्रदेशको आर्थिक वृद्धिदर १ दशमलव ३१ प्रतिशतमात्र हुने अनुमान कार्यालयले गरेको छ ।
गत आर्थिक वर्ष ४ दशमलव ४३ प्रतिशत आर्थिक वृद्धिदर हासिल गरेको मधेशमा यो वर्ष कम ठूलो गिरावटको सम्भावना देखिएको हो । यो वर्ष राष्ट्रिय औसत वृद्धिदर भने ३ दशमलव ८५ प्रतिशत हुने प्रारम्भिक अनुमान छ ।
राष्ट्रिय अर्थतन्त्रमा योगदानका हिसाबले बागमती प्रदेश सबैभन्दा अगाडि छ । यस वर्ष देशको कुल गार्हस्थ उत्पादन (जीडीपी) ६६ खर्ब अनुमान गरेकोमा एक्लो बागमतीले मात्रै ३६ दशमलव ७ प्रतिशत हिस्सा ओगट्ने छ ।
प्रतिव्यक्ति आयतर्फ पनि बागमती र मधेशमा ठूलो अन्तर देखिएको छ । बागमतीको प्रतिव्यक्ति आय २ हजार ६४४ डलरसहित सबैभन्दा माथि रहँदा मधेशको ९३४ डलरसहित सबैभन्दा तल रहने अनुमान कार्यालयले गरेको छ ।
राष्ट्रिय औसत प्रतिव्यक्ति आय १ हजार ५१३ अमेरिकी डलर हुने कार्यालयको अनुमान छ ।
