Sep 20 2026 | २०८३, असोज ४ गते
Follow us
२०८३, असोज ४ गते
Sep 20 2026 | २०८३, असोज ४ गते
काठमाडौं । चितवनको भरतपुर १६ फुर्तिचोक मुख्य कार्यालय रहेको मार्गदर्शन बचत तथा ऋण सहकारी संस्था लिमिटेडले रसुवाको भोटेकोशी नदीमा आएको भीषण बाढीबाट रसुवा, नुवाकोट र धादिङमा भएको जनधनको क्षतिप्रति गहिरो दुःख व्यक्त गर्दै उद्धार, राहत तथा पुनःस्थापनामा सहयोग गरेको छ ।
संस्थाले आफ्नो सामाजिक उत्तरदायित्वअन्तर्गत प्रधानमन्त्री दैवी प्रकोप उद्धार कोषमा १ लाख २९ हजार १ सय २९ हजार रुपैयाँ सहयोग गरेको जनाएको छ । संस्थागत सामाजिक उत्तरदायित्व बहन गर्दै मार्गदर्शन साकोसले राष्ट्रिय संकट समाधानमा हातेमालो गरेको हो ।
विपत्तिको समयमा पीडित परिवारलाई राहत, उद्धार तथा पुनःस्थापनामा सहयोग पुर्याउने उद्देश्यले उक्त रकम प्रदान गरिएको संस्थाका प्रमुख कार्यकारी अधिकृत दीपक गौतमले जारी गर्नुभएको विज्ञप्तिमा उल्लेख छ । विपत्तिमा परेका नागरिकको पीडामा मल्हम लगाउने उद्देश्यका साथ संस्था, समिति तथा उपसमिति एवम् कर्मचारीहरुबाट गरी उक्त रकम योगदान गरिएको विज्ञप्तिमा जनाइएको छ । सबैको साझा दुःख भएकाले कठिन समयमा एकअर्कालाई सहयोग गर्नु मानवताको महत्वपूर्ण दायित्व भएको संस्थाले जनाएको छ ।
संस्थाले बाढीबाट ज्यान गुमाउने सबैप्रति भावपूर्ण श्रद्धाञ्जली अर्पण गर्दै शोकसन्तप्त परिवारजनमा गहिरो समवेदना व्यक्त गरेको छ। साथै, बेपत्ता भएकाहरूको शीघ्र खोजी तथा घाइतेहरूको शीघ्र स्वास्थ्यलाभको कामना गरेको छ।
यसैगरी, मार्गदर्शन साकोसले यस दुःखद् र कठिन घडीमा आफ्नो क्षमता र सामर्थ्यअनुसार राहत कोषमा सहयोग गर्न सबैमा हार्दिक अनुरोध समेत गरेको छ ।
