Oct 30 2026 | २०८३, कात्तिक १३ गते
Follow us
२०८३, कात्तिक १३ गते
Oct 30 2026 | २०८३, कात्तिक १३ गते
एजेन्सी । सामाजिक सञ्जालमा एउटा भिडियो भाइरल छ । भाइरल मात्रै होइन, तीब्र गतिमा भाइरल छ । उक्त भिडियोमा फ्रान्सको सेन्ट डेनिस सहरका मेयर बाल्ली बागायोको पेरिसमा आयोजित एक विरोध र्यालीका क्रममा प्रहरीको अगाडि उभिएर युवा प्रदर्शनकारीहरूलाई जोगाउँदै 'रोक्नुस्' भन्दै चिच्याइरहेको देखिनुभएको छ।
कट्टर वामपन्थी दल 'फ्रान्स अनबोड' सम्बद्ध मेयर बागायोकोले आफूले पेरिसको श्रमिक वर्ग बस्ने उपनगरीय क्षेत्रका विद्यार्थीहरूलाई समर्थन गर्दै आइरहेको र प्रदर्शनका क्रममा प्रहरीलाई बल प्रयोग नगर्न आग्रह गरिरहेको बताउनुभयो। सेन्ट डेनिसस्थित आफ्नो कार्यकक्षमा रोयटर्सलाई अन्तर्वार्ता दिँदै उहाँले भन्नुभयो, 'प्रहरीले विद्यार्थीहरूमाथि जाइलाग्ने र बल प्रयोग गर्ने निर्णय गरिसकेको थियो, जबकि तीमध्ये धेरैजसो विद्यार्थीहरूले प्रहरी अधिकारीहरूप्रति कुनै पनि आक्रामक व्यवहार देखाएका थिएनन्।' मेयर बागायोकोका अनुसार अन्ततः प्रहरीले उहाँसहित प्रदर्शनकारीहरूको समूहमाथि अश्रुग्यास प्रहार गरेको थियो।
पेरिसका सीमान्तकृत उपनगरहरूबाट सुरु भएको यो विद्यार्थी आन्दोलन दुई हप्ताभन्दा बढी समयदेखि जारी छ। फ्रान्सेली राष्ट्रपति इमानुएल म्याक्रोँलाई प्रतिस्थापन गर्ने चुनाव आउन ६ महिना मात्र बाँकी रहँदा यस आन्दोलनले जनतामा व्याप्त व्यापक आक्रोशलाई सतहमा ल्याइदिएको छ।
आन्दोलन सुरु भएयता ६,००० भन्दा बढी प्रदर्शनकारीहरू पक्राउ परिसकेका छन् भने दर्जनौँ विद्यार्थीहरू घाइते भएका छन्। मानवअधिकारवादी समूह र युनियनहरूले प्रहरीले नाबालिगहरू विरुद्ध लाठी, अश्रुग्यास र गैर घातक वस्तु प्रयोग गरी अत्यधिक बल प्रयोग गरेको आरोप लगाएका छन्। अर्कोतर्फ, अधिकारीहरूले भने प्रदर्शनका क्रममा सयौँ प्रहरी अधिकारीहरू घाइते भएको, विद्यालयहरू जलाइएको वा तोडफोड गरिएको, र शिक्षक तथा सर्वसाधारणमाथि आक्रमण भएको दाबी गरेका छन्।
