काठमाडौं । काठमाडौंको कलंकीस्थित मिराकल बचत तथा ऋण सहकारी संस्था लिमिटेडले असहज परिस्थितिबीच पनि आफ्नो कर्तव्य र जिम्मेवारी निर्वाह गर्दै १८औँ वार्षिक साधारण सभा आज सफलतापूर्वक सम्पन्न गरेको छ । रसुवाको बाढीबाट सिङ्गो मुलुकनै पीडामा परेको समयमा पनि सदस्यहरुप्रतिको दायित्वबोध, नियामकीय निर्देशनको अनुपालना तथा  सरोकरावालाहरुप्रतिको जवाफदेहितालाई ध्यानमा राखी मिराकल साकोसले सदस्यहरुको सबैभन्दा ठूलो वार्षिक भेला सम्पन्न गरेको हो ।

संस्थाको वार्षिक साधारण सभा केवल एउटा औपचारिक कार्यक्रम मात्र नभई संस्थाको विगतको समीक्षा, वर्तमान अवस्थाको मूल्याङ्कन तथा आगामी दिनको योजना र लक्ष्य निर्धारण गर्ने महत्वपूर्ण अवसर पनि भएको बताउँदै सभामा प्राप्त अमूल्य सुझाव, सल्लाह, प्रतिक्रिया तथा मार्गदर्शनले संस्थालाई अझ व्यवस्थित, पारदर्शी, सुदृढ र सदस्यकेन्द्रित रूपमा अगाडि बढ्न थप ऊर्जा र प्रेरणा प्रदान गरेको जनाएको छ ।

मिराकलले भनेको छ, 'आज संस्थाले प्राप्त गरेको उपलब्धि कुनै एक व्यक्ति वा एक समूहको मात्र प्रयास नभई सम्पूर्ण सदस्यहरूको विश्वास, साथ, सहयोग र सामूहिक प्रयासको परिणाम हो। यहाँहरूले संस्थाप्रति देखाउनुभएको विश्वास र अपनत्वलाई हामीले आगामी दिनमा अझ जिम्मेवारीपूर्वक आत्मसात् गर्ने प्रतिबद्धता व्यक्त गर्दछौँ। संस्थाको आगामी यात्रा अझ सफल, सुरक्षित र उपलब्धिमूलक बनाउन सुशासन, पारदर्शिता, आर्थिक अनुशासन, सदस्यको हित तथा संस्थाको दिगो विकासलाई प्राथमिकतामा राख्दै अगाडि बढ्ने हाम्रो प्रतिबद्धता रहनेछ।'

यसैबीच, मिराकल साकोसले साधारणसभामा आफ्नो अमूल्य समय निकालेर उपस्थित भई कार्यक्रमको गरिमा बढाइदिने सबैमा कृतज्ञता व्यक्त गरेको छ । मिराकल सहकारीको समृद्धि नै सदस्यहरूको समृद्धि हो, सदस्यको विश्वास नै हाम्रो शक्ति हो भन्दै साकोसले आगामी दिनहरूमा पनि संस्थाका हरेक यात्रामा सबैको निरन्तर साथ, विश्वास, सुझाव र सहकार्य प्राप्त भइरहनेछ पूर्ण विश्वास लिएको जनाएको छ ।

यसैगरी, संस्थाको स्थापना, विकास र निरन्तरतामा प्रत्यक्ष तथा अप्रत्यक्ष रूपमा योगदान गर्ने सम्पूर्ण शेयर सदस्यहरु, संस्थापकहरु, पूर्व तथा वर्तमान सञ्चालक तथा लेखा सुपरीवेक्षण समितिका पदाधिकारीहरु, कर्मचारीहरु तथा शुभेच्छुकहरुप्रति विशेष सम्मानसहित संस्थाले हार्दिक आभार व्यक्त गरेको छ ।