Sep 20 2026 | २०८३, असोज ४ गते
Follow us
२०८३, असोज ४ गते
Sep 20 2026 | २०८३, असोज ४ गते
काठमाडौं। भारतमा उत्पादन भएको खोकीको झोल औषधि (कफ सिरप) सेवनबाट बालबालिकाको मृत्यु भएको घटनापछि औषधि व्यवस्था विभागले सर्तकता अपनाउन आग्रह गरेको छ । औषधिको सुरक्षित र प्रयोगबारे सूचना सार्वजनिक गर्दै आम नागरिक, स्वास्थ्यकर्मी र औषधि व्यवसायीलाई सावधानी अपनाउन विभागले आग्रह गरेको हो ।
भारतीय कम्पनी स्रेसन फार्माले उत्पादन गरेको कफ सिरपमा विषाक्त रसायन पाइएको छ । दूषित कफ सिरपको कारणले अगस्टको अन्त्यदेखि मध्य प्रदेश र राजस्थान राज्यमा ९ वर्ष मुनिका १४ बालबालिकाको मृत्यु भएको हो कि भन्ने बारेमा अनुसन्धान भइरहेको छ ।
औषधिको एक ब्याचमा खतरनाक मात्रामा विषाक्त रसायन भेटिएपछि शनिबार संघीय स्वास्थ्य तथा परिवार कल्याण मन्त्रालयले अनुसन्धानको निर्देशन दिएको थियो ।
मन्त्रालयले दक्षिणी राज्य तमिलनाडुमा स्रेसन फार्माद्वारा निर्मित कोल्ड्रिफ कफ सिरपको नमुनाहरू राज्य अधिकारीहरूले परीक्षण गर्दा अनुमति योग्य सीमाभन्दा बढी डाइएथलिन ग्लाइकोल र एथलिन ग्लाइकोल जस्ता मिश्रणबाट बनाइएको बताएको छ ।
उक्त रसायन औद्योगिक घोलकहरूमा प्रयोग हुने विषाक्त पदार्थ हो । जुन थोरै मात्रामा पनि सेवन गर्दा घातक हुनसक्छ । ‘नमुनाहरूमा अनुमतियोग्य सीमाभन्दा बढी रसायन पाइएको छ,’ भारतीय स्वास्थ्य मन्त्रालयले विज्ञप्ति निकाल्दै भनेको छ ।
मध्य प्रदेशभर सिरप उत्पादन गर्ने कम्पनीका अन्य उत्पादनहरूको बिक्रीमा पनि प्रतिबन्ध लगाइएको छ । तर, उक्त समस्या देखिएको भारतीय कफ सिरप नेपालमा दर्ता नै नभएको औषधि व्यवस्था विभागले दाबी गरेको छ ।
